TACLOBAN CITY – Naglalaum an pira nga mga road safety advocate ngan miyembro han sektor han transportasyon ha Sinirangan Bisayas nga kakatigan han mga senador an ira ginhahangyo nga pagsuspender han ira gintitipahan nga Public Motor Vehicle Inspection Center (PMVIC).
Una hini, mahugot nga gintitipahan han pira nga taga-Sinirangan Bisayas an implementasyon han PMVIC tungod han gin-aalegar nga koleksyon hin hitaas nga mga fees o kabaraydan, dire sakto nga vehicle inspection procedures sugad man an kawaray public consultation ngan transparency bahin hini.
Sumala kan Atty. Neil Sia, Presidente han Sirak Waraynon Eagles Club ngan usa nga transportation lawyer, naglalaum hiya nga papaboran han mga senador an suspension han PMVIC nga magpapakuri la ha sektor han transportasyon.
Nagtutuo ini nga an PMVIC in dire asya an solusyon ha problema ha kadalanan tungod nga an pinakamaaapektaran la hini amo an mga kablas nga motorista.
Dako gihapon daw an mawawara nga kwarta o kalugian han publiko nga mahingangadto lugod ha pribado nga sektor kun igpadayon an implementasyon hini.
Nahibaruan nga an PMVIC in usa nga programa han DOTr-LTO nga nagpapanuyo nga magkaada hin automated inspection han mga sarakyan para han katalwasan ha kakarsadahan o road safety.
