TACLOBAN CITY – Gintawag han pira nga mga opisyales ha syudad han Tacloban kumo ‘inspiring leader’ hi anay presidente Fidel V. Ramos ha panahon han pagtatagmangulo hini ha Pilipinas tikang han tuig 1992 kutob 1998.
Sumala kan Atty. Jerry Uy, konsehal ha syudad han Tacloban, masisiring nga dako an naging legasiya ni Former President Ramos labi na ha pag abot ha komunikasyon, transportasyon ngan sugadman an pagserbisyo hini kumo military officer ngan public servant.
Gindumdom gihapon hini an pagiging “president with a vision” ni FVR tungod ha slogan o vision hini nga “Philippines 2000” nga usa nga socio-economic program hini nga naging inspirasyon para ha mga Pilipino.
Mahibaruan nga tumalikod na ha kadayunan hi anay pangulong Fidel V. Ramos mahitungod ha komplikasyon mahuman nga magpositibo ha COVID-19.
Nagdeklara naman hi Presidente Bongbong Marcos hin “10 days national mourning” ha bug-os nga Pilipinas kumo pakikisubo ha pagkamatay han anay pangulo.
