TACLOBAN CITY – Naglalaom an pira nga mga negosyante ha syudad han Tacloban, nga matatagan hin iwag an ginpatapod ni Presidente Ferdinand BongBong Marcos Jr. ha iya nagin syahan nga State of the Nation Address SONA 2022, may paghismupay ha ekonomiya han bug-os nga nasod.
Sumala kan Hon. Colai Go Information Officer Tacloban Filipino Chinese Chamber of Commerce and Industry / Chairman Brgy. 41 Tac City, nga naglalaom hira nga mga negosyante nga dire mabayaan an pagparibhong han ekonomiya han nasod, ilabi na nga hinay-hinay pala ine nga nabakdaw tikang han epekto han 2 katuig nga pandemya.
Dugang pa han mao nga opisyal, nga dako an ira pagtuo ha presidente nga magagampanan hine an iya mga ginsaad ha SONA ka kulop nga adlaw.
Mababaruan, nga ginpahayag han Pres. han Pilipinas nga dire na hiya magpapatuman hin mga lockdowns ha tanan nga mga areas, kun diin ine mangud an pangunahon nga rason kun kay-anu naluya an ekonomiya, matungod nga nagigin paralisado an ngatanan trabaho, negosyo ngan damo pa nga iba, ngan ginpahayag hine nga kinahanglan balansehon an sektor panlawas ngan sugadman an sektor pan-ekonomiya, agud nga parupadayon an mga negosyo han nasod bisan ha kaluyo mayda la gihapon hulga han COVID-19.
