TACLOBAN CITY– Ginpaangbit hiton usa nga negosyante hiton Tacloban, nga nadugangan an bulyo hiton mga tawo nga nabisita ha downtown area hiton syudad yana nga bulan hiton Mayo.
Sumala kan Hon. Colai Go, Information Officer Tacloban Fil-Chinese Chamber of Commerce, Inc./ Chairman Barangay 41, Tacloban City, usa ha iya ginkikita nga rason, in nakag-release na mangud hiton mid-year bunos an mga mantratrabaho ha pribado ngan sugadman government employee.
Dugang pa hine, maupay an nasabi nga indikasyon matungod nga makakabulig ine ha pag-ursa hiton ekonomiya hiton syudad, ngan makakabulig gihapon ha ira kumo usa nga negosyante.
Ginlalauman pa hine, nga madudugangan pa an volume ngan pagbugi-ot hiton mga tawo sunod nga bulan matungod hiton kapatrunan han Tacloban.
