TACLOBAN CITY – Pira nga mga pala-isdaan ha rehiyon an naapektaran han duro nga kahitaas han temperatura ha nasud kun diin pira han mga ine in nag undang la anay han ira operasyon.
Sumala kan Christine Gresola, Information Officer hiton Bureau of Fisheries and Aquatic Resources Vlll, agi han duro nga kapaso han panahon yana in dire gudman malilikayan an pagkulang hin tubig o paghubas han mga pala-isdaan.
Ha probinsya han Samar, upat nga mga fishponds an nahipatik nga nag-undang la anay han ira operasyon; ha Sta. Fe, Leyte in may-ada gihapon usa nga fishponds an naapektaran kun diin mahitungod han kahabubo han lebel han tubig in nagkamatay an mga isda hine.
Gin papag-ikmat naman hine an mga tag-iya han fish ponds ngan panginanuon pirme an lebel han tubig han ira mga fish ponds kun insakto pa ba ine ngan an kalidad han tubig kun mabubuhi pa ba an mga isda o makakapamunay pa.
Para han dire maaram magkita kun de-kalidad pa ba an tubig in pwede naman dumaop ngan mamakiana ha buhatan han BFAR kun diin mayda mga technical staff nga manginginano han mga fish ponds.
