TACLOBAN CITY – Mahuman nga makansela ha sakob hin sobra duha katuig tungod han nagpapadayon nga COVID-19 pandemic, utro na nga pagdudumaraon ha pinakasyahan nga higayon an sikat nga Sangyaw Festival ha Tacloban kaparte han selebrasyon han kapatrunan han syudad yana nga bulan.
Sumala kan Bardot Atillo, Head han Tacloban City Tourism Office, maabot ha 15 nga mga contingents an mapartisipar kun diin ginkakalakipan ini han mga eskwelahan, community-based groups ngan mga baranggay.
Kalakip ha mga ini an Brgy. 36-A Imelda Village, Brgy. 12 Palanog, Brgy. Paraiso San Jose, Brgy. 39 Calvary Hill, JE Mondejar Computer College, Brgy. 52 Esperas Avenue, Brgy. 85 San Jose,Kasirangan Festival Dancers Metro Tacloban (KFDMT), Brgy. 92 Apitong, SK 74 Tribu Siete Quatro, Youth Org. (SOS) Brgy. 106 Sto. Niño, Brgy. 43 Quarry, Brgy. 62-A Sagkahan, Brgy. 63 Sagkahan, ngan Alliance of Barangay Young Leaders (ABYL).
Matungod nga kinahanglan la gihapon nga magsunod ha mga minimum health protocol in limitado la ha 30 nga mga partisipante an tutugutan nga magpartisipar ha kada grupo.
Pagdudumaraon an Sangyaw Festival ha Hunyo 29, 2022, o usa kaadlaw san-o an fiesta celebration ha Tacloban.
