Gin aaghat han Tacloban City Health Unit an mga mulupyo ha syudad han Tacloban nga magka may-ada hin partisipasyon ha gin dudumara nga preventive mass drug treatment kundiin, gin bubuhat an kinada tuig nga paghahatag hin libre nga medisina kontra ha sakit nga schistosomiasis.
An sakit nga schistosomiasis in maiha na nga problema ha syudad pero diri ini natatagan hin sakto nga atensyon mahitungod an mga mulupyo in diri ngatanan maaram ug nakakaintindi han mao nga programa.
Sumala kan City Schistosomiasis Programs Nurse Supervisor, Mel Tirso Maraviles, positibo hini nga sakit an pira nga mga lugar han syudad han Tacloban kun diin, out of 138 nga mga barangay in mayda 15 nga mga barangay an endemic ug positibo tikang pa han tuig 1970’s basar ha eksaminasyon han tuna nga gin buhat han Department of Health.
An mao nga mga barangay in an Barangay 77, 78, 79, 80, 81 ngan 82 ha Marasbaras samtang ha San Jose an Barangay 84, ha Caibaan an Barangay 95 and 95-A, Barangay 96 ha Calanipawan, Uper Nula-tula, Barangay 100 ha San Roque, sugad man an Barangay 103-A. Kalakip gihapon ha mao nga mga barangay an 107 Santa Elena ug 108 Tagpuro.
Gin aaghat gihapon han mao nga opisina nga mag submit hin baya an tagsa-tagsa nga idibidwal agud ma sabtan kun an mga ini in positibo o diri.
Dugang pa ni Mariviles, an eksaminasyon han schisto in libre kada adlaw ha City Health Office.
