CALBIGA, SAMAR – Gin panginano han mga opisyal han Department of the Interior and Local Government (DILG) ngan ni Calbiga Mayor Red Nacario an water supply system ha Brgy. Macaalan durante han turnover ceremony.
Ha mga barangay han Mahangcao, Borong, ngan Macaalan ha Calbiga, in sobra 1,290 nga residente an mayda na direkta nga koneksyon han tubig ha ira mga panimalay.
Mahitungod hine, naibanan an maiha na nga problema han mga residente ha pagkuha han tubig. Dire na kinahanglan lumaom han mga pamilya sa harayo nga ginkukuhaan hine hin tubig, sangklit mas umupay na gihapon an panlawas, kalimpyo, ngan pan adlaw-adlaw nga panginabuhi han kumunidad.
Nagin posible an nasabi nga pagbabag-o mahuman nga ig-upgrade an anay Level II tikadto ha Level III nga Water Supply System ha pangunguna han Department of the Interior and Local Government (DILG) Region 8 dida han nakalabay nga Enero 20, 2026.
An nasabi nga proyekto in mayda pondo nga P13.33 milyon tikang ha Government Support Fund.
Kaupod gihapon ha mga natuman an pagbubutang an 1,600 metros nga linya han tubo, pagtitindog hin pasilidad para ha water treatment ngan opisina, ngan pagdugang hin 430 nga koneksyon han tubig para ha mga kabalayan.
Sumala kan DILG Eastern Visayas Regional Director Arnel Agabe, sobra pa ha simple nga pagtutukod hin imprastraktura an proyekto—usa gihapon ine nga pamumuhunan ha panlawas han mga residente ngan pamatuod han patapod han gobyerno ha participatory budgeting ngan pakikigbinuligay ha mga organisasyon han civil society.
Samtang, igin kalipay naman ni Calbiga Mayor Red Nacario an pagka-kompleto han nasabi nga proyekto ngan naglalaum naman ine nga makakabulig an nasabi nga proyekto agud mabaton an maiha na nga problema han bungto ha akses han malimpyo ngan talwas nga inumon nga tubig.
Nakiusa naman ha turnover ceremony an mga lokal nga opisyal nga lider han barangay, nga nagpapakita han urusa nga pagbinuligay ha pagpapatuman han programa.
Ginsusuportahan han nasabi nga proyekto an panuyo han nasyunal nga pangobyernuhan nga pakusgon an mga pangunahon nga serbisyo pinaagi han Open Government Partnership, kalakip an inisyatiba sugad han Local Government Support Fund—Support and Assistance Fund to Participatory Budgeting (LGSF-SAFPB), agud masigurado an akses ha talwas nga tubig, mapaupay an sanitasyon, ngan maundang na an open defecation ha pag-abot han tuig-2030.
