SAN ISIDRO, LEYTE – Pira nga armado nga kalalakin-an an nasipatan ha tay-aw nga parte han Brgy. Taglawigan, San Isidro, Leyte dida han nakalabay nga Mayo 5 han presente nga tuig.
Mahitungod han kahadlok ngan pagkabaraka han mga molupyo han nasabi nga lugar, dayun an mga ine nga nagreport ha kapulisan kun diin naman ine nga gin respondehan han mga otoridad.
Sumala kan San Isidro Municipal Police Station OIC Chief of Police, PCpt. Rexel De Asis, waray nira mahibti an armado nga mga kalalakin-an pero subay ha ira pamakiana ha mga residente han nasabi nga lugar, mga security daw an nasabi nga armado nga kalalakin-an hin usa nga hacienda ha nasabi nga lugar.
Samtang, kabaliktaran han syahan nga gumawas nga balita nga maypaghisumpay ha pulitika o tidaraon nga eleksyon an nasabi insidente, gin klaro han San Isidro Municipal Police Station pinaagi hin usa nga Facebook post nga dire konektado ha pulitika an panhitabo.
Subay ha post nga ginpagawas han San Isidro MPS, gumawas ha ira imbestigasyon nga dire pagkakaintindihay ha pagtaga-tuna ha butnga han mga residente ha lugar ngan tag-iya han tuna an rason hine, kun diin mayda na daw apela an mga residente ha lugar ha bar nga naghuhulat pa hin pinal nga desisyon han korte.
Sugadman, andam naman daw nga umiwas an mga residente ha lugar kun dire pumabor ha ira an magigin desisyon han korte.
Ha kaluyo hine in nakigsumpayan naman an San Isidro MPS ha Brgy. Kapitan han Brgy Taglawigan, San Isidro, Leyte, kabahin ha sitwasyon han kahimyangan ngan kaupay ha ira barangay, ngan ginpahimatngunan nga magin mabinantayon ngan maki-parte bisan ha gutiay la nga kontribusyon ha lugar para ha paglikay han krimen.
