TACLOBAN CITY–Umabuyon an pira ka mga parag-uma ha Leyte ha House Bill No. 7663 o an ginduduso nga Farmer’s Pension and Social Protection Act nga tumong nga tagaan an mga kwalipikado nga parag-uma hin P3-K nga pensyon ngan insurance coverage kada bulan.
Ginmalatumat ni Adolfo Olaya, Confederation of Irrigators Association Leyte, nga maupay ine mahitungod nga para ine han proteksyon han mga parag-uma.
Pero, nagpahayag naman ine hin reserbasyon mahitungod nga dire nabubulag an sektor han agrikultura ha pulitika kun diin dapat naka specify kun hin-o an mga kwalipikado nga matagaan han nasabi nga serbisyo.
Ginmalatumat naman ine an nahitabo ha lista han RBSA kun diin mayada nakaklusot nga waray na hagna nga natatagan la gihapon hin ayuda.
Mababruan naman nga an mao nga balaudnon in para ha mga kwalipikado nga elderly, disabled, ngan indigent farmers nga dire sakop hiton mge retirement systems sugad an tikang ha Social Security System (SSS), Government Service Insurance System (GSIS), ngan mga pribado nga systema.
Samtang, nanawagan naman hi Olaya nga upayon han paghan-ay nga maiigo han balaudon an mga kablas nga parag-uma.
