Gin pamatud-an han usa nga lalaki tikang ha Colorado nga dire la tsamba an iya syahan nga pagdaog mahuman niya makab-ot an Guinness World Record para ha pinakadako nga trap hin Venus flytrap ha ikatulo nga higayon.
Pormal nga ginkilala dida han Hunyo an Venus flytrap ni Jeremiah Harris nga mayda kahilapad nga 6.6 centimeters (2.59 inches) o kaparehas hin usa ngan tunga nga palita hin posporo. An nasabi nga sukol in maikokonsidera nga dako kumpara ha komon nga 2 kutob 3 centimeters la nga kahilapad han nasabi nga tanaman.
Hi Harris in 5-anyos pala hadton 1992 han magtikang hiya mahilig ha mga tanaman nga nakaon hin insekto. Ha kamatuoran, nag-alaga hiya hin iba-iba nga carnivorous plants ha luyo han ira balay ngan iginkokonsidera nga usa ha mayda pinakadako nga koleksyon hini ha bug-os nga US.
Syahan nga nakuha ni Harris an titulo para ha pinakadako nga trap ha usa nga Venus flytrap dida han 2020 gamit an cultivar nga kilala ha tawag nga “Alien” nga mayda sukol nga 5 cm. Sinundan ini niya dayun dida han 2021 gamit an usa pa nga tanaman tikang ha kaparehas nga klase nga umabot naman ha 6.1 cm.
Samtang, an iya pinakabag-o nga record in nagtikang ha kakaiba nga cultivar nga gintatawag nga “GJ Montecore,” nga orihinial nga ginpadamo han German nga hi Mathias Maier dida han 2014.
Kumo usa nga triple-time record holder, naghatag gihapon hi Harris hin pira nga simple nga sagdon para ha mga nagkakaruyag nga magpadako hin kalugaringon nira nga higante nga flytrap: Igbalhin ini ha bag-o nga paso kada-tuig. Igbutang ha lugar nga mayda malamrag nga sirak han adlaw. Ighatag an sakto nga timplano han abono. Ngan siguraduhon nga magtikang ha usa nga clone nga ngatikang ha lahi han mga flytrap nga napamatud-an na nga namumukad hin dagko.
