KUMO paghatag hin pagkilala ha lokal nga tradisyon han paghimo hin mga palayok o pottery, usa nga theme park ha Colombia an naghimo hin pinakadako nga alkansya nga baboy o piggy bank ha bug-os nga kalibutan nga himo ha ceramic.
An dadako nga alkansya in matatad-an ha Mano del Artesano – Puebilito de Barro ha bungto han Raquira nga may kahitaas nga 29 feet ngan 6.3 inches, samtang may kahilaba nga 33 feet ngan 11.8 inches, ngan natimbang hin sobra 30 ka-tonelada.
Dire la ini usa nga ordinaryo nga estatwa mahitungod mayda ini nagana nga buho para ha mga sinsilyo kun diin puydi maghulog an mga theme park goers. An mga natitirok nga sinsilyo in gindo-donate ha mga lokal nga animal shelter ha ira lugar.
Puydi gihapon sudlon han mga bisita an sakob han alkansiya kun diin matatad-an an usa nga gallery nga nagpapakita hin kasaysayan han paghimo hin mga ceramic nga alkansya ha nasabi nga rehiyon.
Gumamit naman hin sattelite technology an Guinness World Records agud makalkula an eksakto nga kadako han baboy ngan pormal na maideklara ini nga world’s largest piggy bank.
