TACLOBAN CITY – Gin-anunsyo han Philippine Health Insurance Corporation (PhilHealth) Eastern Visayas an ira pinakabag-o nga programa nga naghahatag hin libre nga konsultasyon tikang ha mga healthcare facilities ha rehiyon ha ilarom han Universal Health Care Law.
Sumala kan Miramar Palacio Zabala, head han Public Affairs Unit han PhilHealth Region 8, an mao nga bag-o nga programa in ira gintatawag nga PhilHealth KonSulTa o Konsultasyong Sulit at Tama.
Labot la ha libre nga checkup ngan serbisyo han health professionals, pira ha mga benepisyo nga makukuha han mga katawhan tikang ha mao nga programa an libre nga diagnostic ngan laboratory examinations depende ha ginrekomenda han doktor, sugadman an libre nga mga medisina o tambal.
Ginklaro naman han mao nga opisyal nga pwede la nga maka-avail an mga katawhan ha mao nga programa ha mga healthcare facilities nga accredited kumo Philhealth KonSulTa provider.
Nahibaruan nga ha pagkayana in mayda maabot ha 28 nga mga accredited KonSulTa providers ha bug-os nga rehiyon.
