Ginpakusog pa han Pilipinas ngan Amerika an iya alyansa agud malikayan an maritime conflict ha West Philippine Sea (WPS), subay ha Embahada han Estados Unidos.
Ine in ha butnga han nagpapadayon nga agresyon han mga barko han China ha gin aagawan nga kadagatan.
Ha usa nga pahayag, ginmalatumat han US Embassy nga committed hira igpadayon an pagbabantay ha Indo-Pacific agud mapugngan an kasamok ngan agud makabug-os hin makusog nga pitad agud mapabilin nga abri an sea lanes ngan dire masakop han iba nga nasud.
Gintagan-duon gihapon han embahada an kolektibo nga depensa nga importante ha pagpalag ngan pagpugong ha agresyon diin man ha First Island Chain, nga nagseserbi nga pangunahon nga maritime barrier para ha US ngan mga kaalyado hini kaupod an Pilipinas agud mapugngan an naval expansion han China ha Pasipiko.
Ginpadig-on gihapon han mga opisyal han Pilipinas ngan Amerika an commitment han duha nga nasud ha 1951 Mutual Defense Treaty.
Ginpahayag gihapon han embahada an pagkondena han Amerika ha ilegal, mapirit, agresibo, ngan mapanguwat nga mga aktibidad han China ha disputed waters.
Nagpatapod an mga opisyal hin pagpapahusay pa han kapas han Pilipinas ha pagbabantay ngan pagbaton ha mga ayat ha kadagatan ngan mga ilegal nga aktibidad sugad han mga iligal nga pangisda sugadman an pagpapahitaas pa han missile ngan unmmaned systems han US ha Pilipinas.
Labot pa hini, gagamiton han Pilipinas ngan Amerika an foreign military financing para ha modernisasyon han AFP ngan PCG ngan papahusayon pa an kolektibo nga depensa.
Igpapadayon gihapon han Amerika an paghahatag han relief commodities ha civilian disaster response authorities han Pilipinas ha mga pangunahon Enhanced Defense Cooperation Agreement (EDCA) sites ngan iba pa.
