TACLOBAN CITY – Ginpahibaro han Public Employment Service Office (PESO) Tacloban, ha publiko ilabi na adton namimiling hin trabaho, nga bisitahon an ira buhatan ha may City Hall Building agud nga mahibaruan an mga bakante nga gin-ooffer nga trabaho han nasabi nga ahensya.
Sumala kan Katherine Singzon, Focal Person han SPES Peso Tacloban, nga pananglitan nga bumisita an mga ine magdara nala nga daan han ira mga resiketos pangaplay hiton trabaho sugad hiton masunod; resume, live birth, police clearance, barangay clearance, NBI clearance ngan iba pa nga mga kaangayan nga dokumento nga kasagaran ginkikinahanglan pangaplay hiton trabaho.
Dugang pa han mao nga opisyal, mayda gihapon naka-post ha ira facebook page han PESO Tacloban kun diin makikit-an gihapon han publiko an ira mga gin-ooffer nga vacant job para ha ngatanan, kinahanglan la nga bisitahon han mga ine an Tacloban City Public Employment Service Office – TC PESO facebook page.
Ginmalatumat naman han nasabi nga opisyal, nga posible hira magdumara hin Mega Job Fair yana nga bulan hiton Agusto, pero ine in ginpipinalisa pa ngan waray pa petsa kun anu an eksakto nga adlaw.
