TACLOBAN CITY – Nagdonar hin mga electric fans ngan iba nga kinahanglan han mga wards ha Eastern Visayas Medical Center an Philippine Chamber of Commerce and Industry Tacloban-Leyte Chapter.
Sumala kan Hon. Colai Go, Information Officer hiton Tacloban Filipino Chinese Chamber of Commerce and Industry ngan Chairman hiton Brgy. 41 Tacloban City, nagkamay-ada hira hin pagharampang han mga nagmamangulo han Eastern Visayas Medical Center kun anu an maibubulig han mga taga-pribado nga sektor ha nasabi nga hospital.
Dida han nakalabay nga duha kabulan in bumisita hira ha opisina han direktor han EVMC kun diin ha ira pagharampang ngan panginano han mga wards in nakit-an nira nga kulang hin mga electric fans an mga wards sanglit nagdumara an mga ine hin donation drive agud matuman an pagbulig ha nasabi nga hospital.
Dida la han nakalabay nga adlaw in pormal na nga gin turn over han nasabi nga grupo an mga gamit nga ira gindonate ha EVMC.
Ada ha upat ka-set hin computer ngan printer, 18 kabug-os nga hot and cold water dispenser, ngan 50 kabug-os nga wall fans an ginhatag han Philippine Chamber of Commerce and Industry Tacloban-Leyte Chapter ha nasabi nga hospital.
