TACLOBAN CITY – Ginpahayag han Department of Social Welfare and Development (DSWD) Regional Office 8 nga posible nga tikangan yana nga maabot nga bulan han Setyembre an kanan yana nga tuig 2020 nga payout han social pension para han mga benepisaryo hini ha bug-os nga rehiyon.
Sumala kan Mavis Baoy, focal person han social pension program han DSWD 8, ha pagkayana in ginproproseso na an vouchers ngan mga dokumento para han duha nga gintudlok nga mga Special Disbursing Officer (SDO).
Dugang pa hini nga nakabutang ha ira guidelines nga kinahanglan nga mairelease ha second semester han tuig an social pension ha mga validated beneficiaries.
Sanglit, agud nga dire matalapas an mao nga aludayday, titigdaon han DSWD an payout para an 1st ngan 2nd semester.
Nahibaruan nga maabot ha P6,000 an nakatalaan nga makarawat han mga social pension beneficiaries para han kanan bug-os na nga tuig 2020.
