TACLOBAN, CITY – Ginmalatumat han Lokal nga pangobyernuhan han Tacloban nga posible pagdumaraon an kapistahan han syudad ha usa ka-semana.
Ginanunsyo dida han nakalabay nga Marso 20, ni Tacloban City Mayor Alfred Romualdez nga pagdudumaraon an mga aktibidades han patron ha sakob hin usa ka-semana kumpara han 30 ka-diyas nga selebrasyon dida han mga nakalabay nga tuig.
Mahitungod hini posible nga maapektaran an mga aktibidades yana nga tuig.
Sumala kan Romualdez, an pagbuhat hini nga pitad in agud maibanan an pas-anon han mg Taclobanon mahitungod ha krisis han paghitaas han lana ha bug-os nga nasud.
Dugang pa hini nga posible nga dire sugad ka-engrande an kapistahan yana ha syudad mahitungod nga gagamiton nala an dako nga porsyento han budget kumo bulig para ha mga apektado han krisis, sugad han mga parupangisda, parag-uma, ngan mga PUVs.
Sumala pa ha mayor nga nai-intindihan niya an publiko pero yana nga panahon han krisis in kinahanglan hin pag-intinde ngan pagburubligay.
Samtang, naglalaom naman an publiko nga mapahalaba pa an pag-selebrar hin sobra usa ka-semana mahitungod nga nakadaras-an naman han Tacloban nga ginsasalin-urog an kapistahan hin usa ka-bulan.
