TACLOBAN CITY- Usa nga patay nga lawas an natad-an han mga otoridad ha Brgy.Langob Laoang Northern Samar.
Ginkilala an biktima kan Elves Barron, 29- anyos, usa nga parupangisda, ngan residente han nasabi nga lugar.
Sumala kan PMAJ. Ricardo Banhawan, Chief of Police han Laoang Municipal Police Station, nga subay ha ira gindumara nga imbestigasyon nga han nakalabay nga Mayo 24, umatender an biktima hin sayaw ha ira barangay, kun diin ginkorsunada ine han pira nga mga kalalakin-an nga nakadto gihapon han nasabi nga sarayawan.
Ha mao nga takna in ginsuntok na an biktima ha sulod mismo han sarayawan kun diin dumalagan ine agud nga makalagiw ha mga nan-kursunada ha iya.
Dugang pa han mao nga opisyal naka-karawat hira hin blotter tikang ha pamilya han biktima han Mayo 25, kun diin gindeklara nga nawawara na ine.
Mahuman an 3 ka adlaw in nakit-an han mga otoridad an patay nga lawas han biktima nga nakadto ha parte han masiot nga dapit han nasabi nga barangay ngan waray na kinabuhi.
Mababaruan nga maabot ha 6 nga mga person of interes an ginbabantayan yana han mga otoridad kasumpay ha nasabi nga panhitabo, matungod nga an mga ine an urhi nga nakit-an nga nan-kursunada ha biktima han nakadto pa ine han sarayawan.
Subay ha mga kapulisan nga an biktima in nakag-angkon hin magkalain-lain nga bun-og ha iya lawas ngan sugadman bu-ong an baba hine ngan an usa nga parte han iya mata kun diin ine an ginhihingita nga rason han mga otoridad han iya dayon nga kamatayon.
Hapagkayana, in ginmomonitor na hiton mga kapulisan an nasabi nga mga suspek, ngan desidido nga magsalawad hin kaangyan nga kaso an pamilya han biktima, kontra ha mga gintutuohan nga mga suspetsado ha mao nga panhitabo.
