INTERNATIONAL – Nadiskubrehan han Israeli forces an patay nga lawas han lima nga mga bihag han Hamas ha natabo nga pag-atake dida han Oktubre 7.
Naibalik na ha Israel an patay nga lawas han mga biktima nga ginkilala kanda Maya Goren, sugad man an mga sundalo nga hira Tomer Ahimas ngan Kiril Brodski, ngan mga military reservist nga hira Ravid Aryeh Katz ngan Oren Goldin.
An nasabi nga mga biktima in una na nga gindeklara nga patay han military ngan Israeli campaign group nga Hostages and Missing Families Forum.
Kun manunumduman nga nakapag-rekord an Israel hin 1,197 nga indibidwal an namatay ha siyahan nga adlaw han pag-atake.
Maabot naman ha 251 an gin-bihag han militante nga Hamas, kun diin 111 dinhi in nagpapabilin ha Gaza kalakip na an 39 nga gin-totoohan han militar nga patay na.
