Maghaharampang an mga senador ha usa nga caucus agud maglatag hin mga “ground rules” para ha posible nga pakikig-istorya ha Chinese Embassy kasumpay ha istoryahon ha West Philippine Sea (WPS).
Gin kumpirma ni Senate President Pro Tempore Panfilo “Ping” Lacson an pagdudumara han mga senador hin caucus nga panuyo magtudlok hin klaro nga mga parametro kun patiunan-o aatubangon an sensitibo nga isyu hin dire nagkaka-pisikalay o nagkakasamok an mga magbabalaod. Posible daw gihapon nga makiusa an minority bloc ha caucus kun kakaruyagon han mga ini.
Manunumduman nga syahan nga gin abrihan ni Lacson an posibilidad han usa nga hapsay nga pag-iistorya ha butnga han mga senador ngan han Chinese Embassy ha Manila mahuman nga pahayag ni Ambassador Jing Quan hin kaandaman nga makig-dayalogo ha mga lider han nasud agud maibanan an nagtitikaduro nga balyuay han mga pahayag kasumpay ha WPS.
Kasumpay hini, gintagan-duon naman han senador nga trabaho han gobyerno, labi na han Armed Forces, nga siguraduhon an seguridad ngan proteksyon han mga Pilipino nga nag-uukoy ha Pag-asa Island, nga mayda ginbabana-bana 400 ngada ha 500 nga residente kaupod an mga botante ngan istudyante.
