TACLOBAN CITY – Nagklaro an Pastrana Municipal Police Station may paghisumpay han nahitabo nga komosyon dida han nakalabay nga Hulyo 14 ha Pastrana, Leyte nga ginkadabihan han tulo nga media personnel ngan usa nga police.
Sumala kan PMaj. Darwin Dalde, Chief of Police hiton Pastrana Municipal Police Station, dida han Hulyo 14 in personal hiya nga nakakarawat hin tawag tikang han PCpl. Rhea Mae Baleos kun diin didto daw han Sitio Kankamartes Brgy. Jones Pastrana, Leyte in mayda mga armado nga kalalakin-an sanglit nag mando daw hiya ha iya mga personnel nga ig verify an nasabi nga panhitabo.
Dayun naman daw nga nagresponde an mga kapulisan ha nasabi nga lugar kun diin pag abot han mga ine ha lugar han insidente in nahitatabo na an nag viral nga komosyon. Dugang pa hine, ha paglibot ngan panginano han mga nagresponde nga kapulisan in waray an mga ine may nahikit-an nga basiyo hin bala ngan subay gihapon han mga ine in dire nakakatutok an pagpabuto han pusil ha lugar nga may komosyon kun diin posible daw nga paghadlok la ine han mga nakadto.
Samtang, ginyakan gihapon hine nga mayda na nira nakuha nga ngaran han nagpabuto han pusil kun diin gin aasikaso na ine agud mapasakahan ine hin reklamo. Padayun panaman daw nira nga ginbeberipika kun tikang diin nga kampo an nagpabuto han nasabi nga pusil mahitungod nga tulo daw ka-kampo an nakadto, an kampo ni PCpl. Rhea Mae Baleos, an nagprenda, ngan an nag-aangkon han ginprenda.
Ha pagkayana in aadto na daw ha Holding Office han Leyte Provincial Police Office an mag-asawa nga Baleos kun diin didto na an mga ine gin-assign ngan gin turn-over na gihapon an mga pusil hine ha Supply. Nagpailarom na daw gihapon an mga ine hin Gun Powder Residue Examination agud mabaruan kun nagpabuto ba gihapon an mga ine han ira pusil.
Ginklaro gihapon ni Dalde ha publiko nga patas an ira ginhimo nga imbestigasyon ngan waray hira ginhimo nga harassment o bisan anu nga klase hin harassment ngadto han mga media personnel sugad han nagsasarang nga video ha social media kun diin ha kamatuuran daw in mahuman an panhitabo han pagpabuto han pusil in dayun nira nga gindara an mga involved nga media personnel ha ira istasyon agud malikayan an posible mga maraot nga panhitabo.
