TACLOBAN CITY – Gin tikangan na paghingayad han pira nga parte han merkado publiko han syudad han Tacloban nga ginbibiawan hin tubig kun nauran o bisan dire.
An nasabi nga karsada in an tikang ha may Sabang nga area kutob ha may luyo han usa nga fastfood chain ha Quezon Boulevard nga dapit.
Sumala kan Tacloban City Supermarket OIC Superintendent, Edgardo Ogardo, kada-block an paghingayad han karsada ngan gindadagmit ini agud direk mahiabtan han tag-uran.
Ha lain nga bahin, samtang nagpapadayon an paghingayad han nasabi nga karsada in ginpatuman la anay an one-way scheme ha mga motorista. An mga truck nga magdidiskarga hin produkto nga matikang ha Abucay in pwede maka-deretso ha Sabang para magdiskarga, samtang an mga matikang naman ha downtown area nga tipakadi ha may Anibong o Abucay in aada maagio ha mga Rizal Avenue ngan maliko ha may Burgos St. ngan deretso na.
Target naman nga mahuman an paghingayad han karsada yana nga Agosto 2026.
