” Diri pagtindog hin usa nga political dynasty.”
Ini an nagin kabatunan han pamilya Ong han pakianhan hira han mga tinaglawas han media kabahin han pagkandidato han tulo nga myembro han ira pamilya mahuman hira mag-file hin sertipiko de kandidatura ha opisina han Comelec ha Carigara Leyte kakulop nga adlaw.
Sumala kan Mayor Eduardo Ong, kon papalaron hiya ha iya kandidatura , magigin ikatulo na niya ini katermino.
Kon matapos na ini diri naman mangangaruyag sidngon nga maliwan ha iya an iya anak nga Eduardo Ong Jr, tigsiring liwat ka bise Mayor ha ira bungto.
Igpapadayon daw niya an pagpaparibhong han ekonomiya han ira munisipyo.
Ginmalatumat pa ni Mayor Ong nga tikang han lumingkod ini kumo alkalde humitaas an ira revenue tikang ha 15 M ngadto ha 35 M.
Samtang sumala liwat han 22 anyos nga Business Management graduate nga hi Eduardo “Dodo” Ong Jr hingyap hini nga magin usa nga highly urbanized city an bungto han Carigara bisan pa kon maaram hiya nga maiha ini nga proseso.
Bisan kon batan-on pa ini ngan waray eksperyensiya ha pulitika in andam daw ini nga mabaro tikang ha mas eksperyensyado haiya. An importante in aada ha iya kasing kasing iton pagserbisyo.
Mayda daw ini background ha leadership ngan management kumo nagin student leader ini ha La Salle han naeskwela pa ngan nagtatag-iya liwat hin 2 nga bar ha Manila.
Nagtutuo naman hi Dodo Ong nga diri maraot kon nakandidato an pira nga myembro han ira pamilya kon an panuyo naman in para ha kaupayan han mga Carigaranon.
Manunumduman nga una na nga nagfile hin Certificate of Candidacy an bugto ni Mayor Ong kumo Congressman han ikaduha nga distrito han Leyte hi incumbent Representative Henry Ong dida han nakalabay dida han nakalabay nga Huwebes ha opisina han Provincial Comelec.
Waray pa liwat naghaon han ira sertipiko de kandidatura an katugbang han tutulo nga Ong.
Mababaruan nga may 49 nga mga barangay an bungto han Carigara nga may purluminos 35,000 nga mga registered voters.
