TACLOBAN CITY – Excited na an tanan han mga pageant fans sugadman an mga supporters han mga pambato han Eastern Visayas para ha pagbubuhaton nga Coronation Night han Miss Universe Philippines 2024 na magtitikang niyan nga alas otso hiton gab-i.
Pira nga mga pasabog ngan surpresa an angay daw bantayan ha mga pambato han Eastern Visayas particular na tikang ha Leyte, Tacloban ngan Kananga.
Sumala kan Pette Figueroa, Marketing Head han Miss Universe Philippines-Leyte, excited ngan hitaas an ira expectations ha magiging performance han ira pambato nga hi Angel Rose Tambal para ha pagdudumaraon nga coronation night.
Dugang pa hini nga hi Tambal in lakip ha Top 5 Best Runway sanglit ginlalauman na ira nga dako an tsansa nga makasulod na ini ha Top 20.
Ginbuyagyag naman ni Figueroa nga usa ha mga angay bantayan han mga pageant fans ngan supporters an susul-uton ni Tambal nga “Yolanda Gown” nga nagpapakita han istorya hini sugadman han mga Leyteños ha pakipagbisog ha kaluyo han naging paglasurbo han bagyong Yolanda han tuig 2013.
