PALO, LEYTE – Gin tikangan na han bungto han Palo dida pa la han Lunes Santo an mga aktibidad hini may paghisumpay ha Semana Santa 2026.
Sumala kan Palo Auxiliary Traffic Unit Head, Romeo Abaño, dida han nakalabay nga adlaw in nagkamay-ada hira hin LGU Station of the Cross ha ruta han prusisyon ha Palo.
Yana nga adlaw, gintikangan gihapon an Visita Iglesia nga ginpapangunahan han Lokal nga Gobyerno han Palo, ngan buwas naman nga adlaw, Hwebes Santo in magtitikang an pagsaka ha mga bukid-arampuan han mga deboto sugadman, ha Biyernes Santo in pagdudumaraon an re-enactment han kaagi ngan pagkukuri ni Hesus
Ha lain nga bahin, pira nga kakarsadahan an nakatalaan nga temporaryo saradhan pag-abot hiton Biyernes Santo tinikangan hiton alas-4 hiton maagahon.
Syahan nga sasaradhan an Caloogan Road ha may West Bypass, kun diin sarado ini kutob ha may gasolinahan ngan pasulod han Guinhangdan Hill.
Sarado gihapon an parte han National Highway ha may Purisima Road ha may gasolinahan ha merkado nga dapit han bungto—tikang pagsulod tikadto ha may Guinhangdan Hill.
Lakip gihapon an San Roque St. corner Acebedo St. tikadto ha may Guinhangdan Hill.
Panuyo han pagsasarado han pira nga kakarsadahan nga matagan hin hiwag an mga deboto nga masaka ha bukid-arampuan, agud magin mahimyang an ira pagsaka ngan waray magin anuman nga balaong tipakadto.
