TACLOBAN CITY – Nagtutuo an pira nga mga negosyante ha Tacloban nga mayda epekto ha ekonomiya han syudad an dire paghahatag hin ekstensyon ha renewal han mga business permit han mga negosyante ha syudad.
Una hini, ngada han naglabay nga Enero 31 naghuman an renewal han business permit nga waray penalty tungod han pagveto ni Tacloban City Mayor Alfred Romualdez han kunta ekstensyon hini tubtob yana nga bulan han Pebrero.
Sumala kan Eugene Tan, Presidente han Philippine Chamber of Commerce and Industry Tacloban Chapter, posible nga magkaada ini hin epekto ha ekonomiya han syudad tungod nga posible nga damo nga mga business owners an dire makakapaglukat han permit tungod han penalidad.
Kasagaran manggud han mga gudti nga negosyante an pinakaapektado hini labi na tungod han nagpapadayon nga epekto han COVID-19 pandemic ha pan-negosyohan.
Aminado naman ini nga obligasyon han mga nagpapakabuhi ngan nagnenegosyo nga maglukat hin permit pero naglalaum an mga ini nga unta in matagan pa hin konsiderasyon han syudad an apektado hini.
