TACLOBAN CITY – Ginlalauman nga matatapos ha tuig 2028 an pagtukod han Tacloban City Philippines Temple han The Church of Jesus Christ of Latter-day Saints.
Sumala han impormasyon nga nahikay han Bombo Radyo Tacloban tikang han kanan simbahan communication department nga waray madelatar an pagtukod han temple tikang han magbuhat hin groundbreaking ini dida han Enero 18, 2025.
An nasabi na templo in namumutang ha hapit tulo ka ektarya nga lote ha Tacloban Bypass Road Brgy. Utap-Caibaan nga kun diin, duha ini ka andama nga mayda naman kahiluagon nga 21,407 square feet.
Ha Pilipinas, mayda na pira pa nga mga temple nga una na nga gin abrehan sugad han Manila, Cebu, Urdaneta, Alabang, Davao, ngan Bacolod, pero labot la han gintitindog nga Tacloban, nagpapadayon gihapon an konstruksyon ha Cagayan de Oro.
Una na nga gin-anunsyo an pagtindog hin mga templo ha Naga, Santiago, Iloilo, Tuguegarao, Laoag, ngan San Jose del Monte ha Bulacan.
An Church of Jesus Christ in mayda 383 nga templo ha bug-os na kalibutan lakip an 214 na gin abrehan na.
An templo in iba ha mga meetinghouse o chapel kun diin ginbubuhat an mga Domingo nga pagsimba. An templo amo an lugar para han mga sagrado nga ordinansa nga nanunuyoan nga magparig-on han pamilya ngan espirituwal nga panumpa ha Dios.
Samtang, gin-abrehan naman ha publiko an ikaduha nga templo han The Church of Jesus Christ of Latter-day Saints ha bug-os nga Visayas ngan ikaunom ha Pilipinas ha Bacolod City, Negros Occidental.
Agud naman tagan hin higayon an mga tawo nga makabisita ngan mabaruan an katuyoan han templo, magigin opisyal ine nga abri ha publiko nga nagtikang dida han Huwebes, Abril 16, 2026 kutob ha Mayo 2, 2026.
Dida han Abril 13, ginpakita ha media an sulod han templo pinaagi hin usa nga tour nga ginpangunahan ni Elder K. Brett Nattress tikang han church headquarters Temple Department, kaupod an iba pa nga lider han simbahan. Tinambongan ini han mga representante han media tikang ha Visayas.
Gin-aabrehan an templo ha publiko antes han nakatalaan nga dedication ceremony ha Mayo 31, basi mahibaroan han katawhan an karuyag signun han “House of the Lord” ngan makita an kahusay ngan kasagradoan han sulod hini nga ha takna naman nga magin dedicated temple na ini, diri na puydi makasulod hin basta-basta an mga katawhan kalakip na an mga miyembro hini.
