TACLOBAN CITY – Nanawagan ha pagkayana an pira nga mga negosyante ha syudad han Tacloban nga tagan hin solusyon han gobyerno an problema ha duro nga paghitaas han presyo han kuryente nga ginbabaydan han mga konsumidor.
Sumala kan Eugene Tan, Presidente han Philippine Chamber of Commerce and Industry Tacloban Leyte Chapter, ha pagkayana in masisiring nga nakakabaraka an paghinitaas han presyo han kuryente nga dako nga pasakit ha mga katawhan.
Ginhihingita naman nga rason hini an paghitaas an generation charges tikang ha mga generation companies.
Labot pa hini, an gutiay nga ihap han mga planta hin kuryente ha nasud an usa gihapon ha rason han paghinitaas han presyo hini.
Nagtitikaguti manggud an suplay ngan nagtitikahitaas liwat an demand sanglit nagiging rason ini ha paghitaas han presyo.
Ini in dapat daw nga panginanuon ha national nga lebel agud nga makaaghat ha pagtindog hin bag-o nga mga planta agud nga mapahitaas an suplay han kuryente ngan mapaubos an presyo hini.
