TACLOBAN CITY — Utro nga magdudumara hin inspeksyon an City Government han Tacloban ha mga pampasahero nga sarakyan nga gisi an mga barriers ngan mga pasaheros nga diri nagsusulot hin face shields.
Ini in kasunod han padayon nga paghinitaas han kaso nga COVID-19 ha siyudad ngan ha iba pa nga parte han rehiyon.
Sumala kan Leo Bahin, head han Committee on transportation ngan konsehal han Tacloban, panmumultahan an mga driver/operator han pampasahero nga sarakyan nga gisi an mga barrier ngan didrikit hin duro.
Diri naman tutugutan pagsakay an mga pasaheros nga waray sulot nga mga face shields. Dugang pa hini nga utro nga magstristrikto an siyudad han pagpatuman han mao nga mga protocols mahuman nga maobserbaran nga ini in diri na ginsusunod han kadam-an.
