TACLOBAN CITY – Ginpahayag han Tacloban City government nga gintutugot la gihapon ha pagkayana ha publiko nga kumadto ha mga beach resorts ha syudad para mangarigo.
Ini in mahitungod nga nakapailarom ha modified general community quarantine (MGCQ) an bug-os nga syudad.
Sumala kan Atty. Christian de Dios, Chief of Staff han Tacloban City, 50% la an kapasidad nga gintutugot para ha mga karuyag nga kumadto ha mga beach resorts ha syudad ngan dire gihapon gintutugot an videoke.
Ginsisiguro gihapon hini nga mahugot an ginbubuhat nga monitoring han Business Permits and Licensing Division (BPLD) han Tacloban sugadman an mga opisyales han kada barangay ha pagsiguro nga masusunod an 50% capacity rate ngan an health protocols kontra COVID-19.
Nahibaruan nga may kaaatubangon nga penalidad an mga matalapas ha mao nga palisiya sugadman an tag-iya han beach resorts.
