TACLOBAN CITY – Ginmalatumat ni Dickson Q. Bernales, Institutional Services Department han Samar Electric Cooperative (SAMELCO II) nga an paghitaas hiton sukot han mga nagbabaligya han kuryente o mga power suppliers in an usa nga rason han pagumento hiton baraydan han kuryente dire la ha buhatan hiton SAMELCO II pero magin an mga electric cooperatives ha Sinirangan Bisayas pati na ha bug-os nga nasud Pilipinas.
Dugang hini nga damo mangud iton mga factors kun kay-ano nanhitaas an sukot han kuryente; labot la hiton paghitaas an generational charges, an paghitaas gihapon hiton presyo han mga uring matungod hiton kasamok ha iba nga nasud in usa nga rason. An uring mangud in kadaras-an gingagamit kumo enerhiya para makaghimo hin kuryente nga kun diin, daw ginpapalit pa an mga ini ha gawas.
Usa gihapon nga nakikita nga rason in an gasto pag-maintan han mga power stations han mga suppliers nga kun diin, matungod han pagdamo han demand ngan pagdako han kunsomo hiton kuryente in dire naakos han mga ini rason nga nagkakaguguba ngan kinahanglan aydon ngan ig-maintain.
Samtang, ginmalatumat naman ni Bernales nga an hitaas nga sukot in dire permanente, dayon nga mahamubo iton bill han kuryente kun humamubo na iton sukot han power suppliers o kun makabiling an mga ini hin iba nga power source para hiton kuryente ha nasud.
