TACLOBAN CITY- Ginpasabot han National Grid Corporation of the Philippines (NGCP) nga nahuman na an ira paghingayad han mga conductors ngan mga poste ha may Babatngon-Abucay 69kv Line Portion nga nagdurot hin mga scheduled power interruption han nakalabay nga mga adlaw ha coverage area han Leyte II Electric Cooperative (LEYECO II).
Durante han pakipaghimangraw kan Michael Sabejon, Government Relations and Regional Affairs lead specialist han NGCP ha programa nga Bombo Hanay Bigtime, in ginyakan hini nga ira na ginkakanselar an una na nga iginpagawas nga impormasyon ha LEYECO II para han mga scheduled power interruption ha mga masunod nga mga adlaw mahitungod nga nahuman na an ira ginbubuhat nga mga paghingayad.
“So far, for the replacement of our cable wires, tapos na po yung target natin. Instead of six (6) na mga scheduled power interruption for the reconductoring activities, natapos po natin yan for only two (2) na mga scheduled.” yakan ni Sabejon.
Pero ginklaro hini nga diri liwat hira maghahatag hin kasiguraduhan ha publiko nga waray na mga scheduled power interruption mahitungod nga ira liwat ginbabantayan an mga hot spots.
“Kung tapos na siya, may mga activities yung technical team natin basta mayroong mga failure, baka mayroong need for adjustments, kailangan ng immediate replacements yung ibang mga parts. So as of now, wala pa po tayong naka schedule na mga power interruptions.” dugang pa ni Sabejon.
Naiintindihan naman daw han NGCP an sentimyento han publiko ha ira ha kada mayda natatabo nga mga brownouts, nga kun diin, yakan hini nga ha ira parte in ginbubuhat la nira an ira trabaho agud marestore an kuryente ngan magin maupay an linya hini agud naman nga malikayan na an natabo nga pag brownout dida han pagtapo han bag-o nga tuig ha mga lugar han Babatngon, Palo ngan Tacloban City, Leyte.
Aminado gihapon ini nga ha kada nagkakaada hin pagparong hin kuryente, naapektuhan an ekonomiya han usa nga lugar.
“We also ask for the support and understanding of the public na sana for the upcoming na mga activities na mayroong maintenance na talagang mag cooperate kasi meron talagang mga land owners na ayaw magpapasok, ayaw magpa conduct ng mga activities namin, mga preventive maintenance namin so yun po yung mga barrier na nagiging sanhi kung bakit natatagalan tayo sa pagconduct ng mga activities.” yakan pa ni Sabejon.
Kun mahihinumduman, una na nga nagpagawas hin surat an NGCP ha LEYECO II nga nagpapasabot nga magkakaada hin mga pagparong hin kuryente ha mga adlaw han Marso 1, Marso 16, Marso 30, April 12, Abril 19 ngan Abril 27, 2025.
