TACLOBAN CITY — Ginpakurukusog pa han mga kapulisan han Police Regional Office 8 an pagdakop han mga suspek nga responsable han natabo nga Hilongos Bombing dida han December 28, 2016.
Sumala kan PCInsp Rex Cadiller, leader han Tacloban City Safety Company nga ginpasarang na nira pinaagi han social media an mga dagway han mga suspek nga ginkilala nga hira Jake Anthony Macuto, alias Yusuf Perez, ngan 3 pa nga mga John Does.
Gin aaghat naman han mga kapulisan an mga katawhan nga makipagsumpayan ha ira kun may nahibabaruan kun hain namumutang ha pagkayana an mao nga mga suspek
Dugang pa ni PCInsp Cadiller, nga ha pagkayana in waray pa hira nakukuha nga impormasyon bahin ha iksakto nga lokasyon han mao nga mga Suspek.
Samtang, ginpatapod naman nga igpapabilin nga confidential an mga pangilal-an han mga makakaghatag hin impormasyon parte han mga responsable han Hilongos bombing.
Una hini han isyuhan hin Arrest warrant an 3 nga mga Suspek mahitungod han Kaso nga Frustrated Murder kasumpay han pagkasamad han 32 nga mga indibidwal han natabo nga pagbobomba ha Hilongos.
