TACLOBAN CITY – Nakatalaan nga magkaada hin pagbabag-o ha mga ginpapatuman nga mga protocols ha mga nangunguli nga Overseas Filipino Workers (OFWs) ha rehiyon yana nga maabot nga Pebrero 1.
Ini in kaparte han pagsiguro nga dire makasulod ha rehiyon ngan dire na maglarab pa an kaso han UK variant han COVID-19.
Sumala kan Sergio Borgueta, Regional Director han Overseas Workers Welfare Administration (OWWA) Regional Office 8, kaparte han mao nga pagbabag-o an protocol nga igpapatuman in kinahanglan nga pag-ulpot ha usa nga OFW ha Manila in dayon ini nga igpapailarom ha quarantine ngan ha ika-unom kaadlaw han isolation hini in kinahanglan nga igpailarom ini ha RT PCR o swab test.
Kun magnegatibo an mao nga OFW ha swab test in tutugutan na ini nga makauli ha ira bungto o LGU para tapuson an nasasalin hini nga mga adlaw ha 14 days quarantine hini.
Usa gihapon ha pagbabag-o nga igpapatuman amo an pagkuha hin duha nga specimen ha usa nga OFW kun diin an usa hini in para RT PCR o swab test ngan an usa naman in para ha pagdetect kun positibo o negatibo ini ha bag-o nga UK variant han COVID-19.
Nahibaruan nga han naglabay nga mga adlaw in naghitaas an ihap han mga OFWs nga naulpot ha rehiyon otso.
