TACLOBAN CITY — Maabot hin 95 nga acquired assets han Pag-IBIG Fund an ginpapailarom yana nga hin public auction ha Robinson’s North Abucay kutob buwas nga adlaw.
Ini nga mga propyedad in namumutang ha syudad han Tacloban ngan han kahirani nga munisipyo hini an Palo, Alangalang, Barugo, Tanauan, Dulag, Julita, MacArthur ngan Abuyog.
Ha usa nga press briefing kakulop nga adlaw ginpahayag ni Angelo Hermosisimo, Officer -In-Charge han Pag-IBIG Fund Acquired Assets Division,nga an public auction in usa ha ira nga programa nga maghahatag hin oportunidad ha karuyag nga magkamay-ada hin kalugaringon propyedad labi na adton napleti hin balay ngan adton namimiling pala.
Pero ginklaro han opisyal hiton Pag-IBIG nga diri hira ada ha negosyo hin pamaligya hin propyedad.
Gindidispose nira ini para marekober nira an kwarta nga ginpahuram nira ha borrower ngan waray na kabayari.
Ikaduha, usa ini nga maupay nga pamaagi para magkaada hin kalugaringon balay ha hibubo nga kantidad.
“We are disposing our acquired properties for two reasons: First is to recover what was lent out and what was not paid by the borrower, and second, to provide the members a smart way of having homes of their own at the very least possible cost,” an pamahayag ni Hermosisimo.
Ini naliwat an ikaduha nira nga public auction ngan disposal han ira acquired assets yana nga tuig kon diin dida han nakalabay nga Pebrero 21 in damo liwat an nagpartisipar.
Hihimuon na liwat ini nga quarterly basis kon diin yana nga bulan an tikang hini.
An pag-auction han propyedad in depende ha kondisyon han balay kon diin ginbabase ini ha latest appraisal value.
Ha pagbubuhaton nga auction process,magkakaada anay hin registration.
Susundan ini hin usa nga pre bid conference kon diin ilalatag an guidelines han aktibidad.
Magfi-fill out liwat hin form an mga bidder kaupod na an ira sealed envelope nga may bid money nga cash o di man ngani manager’s check.
Ginklaro han Pag ibig nga diri hira nakarawat hin personal check.
Para magkaada transparency, kaupod han Pag ibig an represante tikang ha Commission on Audit (COA) samtang ginpa-flash an resulta han bidding ha screen.
An bid bond han nagdaug nga bidder in igkokonsidera nga downpayment ngan an balance in pwede bayaran pinaagi hin cash, short term installment o pinaagi housing loan monthly amortizations.
Samtang para han waray magdaug nga bidder, igrerefund liwat an ira bid bond.
An mga propyedad nga waray kapalit dida han auction in pwede liwat paliton pinaagi hin negotiated sale ha first come first serve basis ngan may reservation fee nga P1,000.
