TACLOBAN CITY – Maghuhuman na yana nga maabot nga Abril 15 an pag-salawad ngan pagbayad han mga Annual Income Tax Return para han tuig-2025.
Sumala kan Bureau of Internal Revenue-Revenue District Office 88 Eastern Leyte and Biliran, Revenue District Officer, Rizalina Estrada, waray na hini magigin extension o pag-ugsod nga mahitatabo sanglit samtang dako pa an panahon in singabuton na ini agud magbayad.
Naghangyo naman ini ha mga tax payers nga magfile ngan magbayad na ugsa pa an nakatalaan nga deadline agud makalikay ha pagdinagmiton ngan halaba nga pila, sugadman han kadamo han tawo.
Nagpahimatngon gihapon ini nga an dire makakabayad ugsa an Abril 15 in magkakamay-ada hin penalidad, kun diin kun may-ada kabaryadan, mabayad ini hin tax due, 25% surcharge, 12% annual interest, ngan compromised penalty kun diin madepende naman ini kun pira an kabaraydan—an minimum in P1,000 ngan an maximum in P50,000.
Samtang, pwede naman magfile online pinaagi han duha nga paagi:
Syahan, pinaagi han Electronic Payment and Filing System (eFPS) kun enrolled ha nasabi nga system.
Ikaduha, kun dire enrolled ha eFPS, pwede naman mag-file ngan magbayad pinaagi han eBIRForms, kun diin kinahanglan la mag-generate kun mayda hin form ngan ig-fill out ini, otomatiko naman nga magawas an kabaraydan mahuman ig-validate han system. Paggawas han kantidad han babaydan, pwede pumakadto ha bangko pagbayad ngan pwede gihapon gumamit hin mga e-wallets.
Ha pagkayana, mayda nala pito kaadlaw an mga tax payers agud magbayad han ira kabaraydan ngan makalikay han penalidad.
