TACLOBAN CITY – Padayon nga igindidire han ordinansa han Tacloban an pagpa-agi han mga tricycle ha mga dagko nga kakarsadahan han syudad sugad hiton Real St., Justice Romualdez St., Rizal Avenue, ngan Avenida Veteranos St.
Sumala kan TOMECO Operations and Enforcement Head, Restituto Reglos, mayda man mga sitwasyon nga igintutugot an pag-agi ha mga highways pero nadepende gihapon ini ha sitwasyon.
Iginpananglitan ni Reglos nga kun aadto naukoy ha norte Tacloban an tag-iya han tricycle in gintutugutan ini nga makaagi ha mga highways kada aga, para makakadi ha downtown ngan makapan-masaheros sugadman ha pag-uuli kada-kulop, pero kun pag-tuyo la nga pag-agi in dire ini pwede.
Ginmalatumat gihapon hini nga bisan an alternatibo nga ruta nga igin alutaga ha mga tricycle para han kadagmitan o emergency nga paggamit in naaabuso gihapon.
Sumala pa kan Reglos, gintagan na gihapon nira hin designated area o pilahan an mga pampasaheros nga tricycle agud dire na an mga ini maglinibot-libot kun waray pasaheros ngan malarga nala kun may-ada na sakay.
Ginpahinumdom gihapon hini ha mga magtatalapas nga dadakpon an mga ini kun dire magsunod ha iginpapatuman nga ordinansa.
