TACLOBAN CITY – Nakumpiskar han mga operatiba han PDEA – Region 8, PNP Northern Samar ngan han High Way Patrol Group han Philippine Coastguard an gin aalegar nga shabu ha Brgy Jubasan Allen N. Samar.
Ginkilala an suspek kan Mangayao Mitomara, 40-anyos an pangidaron, ngan residente han Sudoc, Marawi City, Lanao Del Sur.
Sumala kan Rogellete Urgel, Information Officer han Philippine Drug Enforcement Agency (PDEA) Regional Office 8, natimbang ine hin more or less 10 kilos kun diin mayda naman ine market value nga maabot ha P68 milyon.
Nabalabgan han mga otoridad ha usa nga check point an sarakyan hiton suspek, kun diin han pagkitaa han sarakyan hine in nahikit-an an usa nga kahon nga mayda sulod nga 10 kabug-os nga color green nga plastic han Chinese tea bags nga may sulod han gin aalegar nga shabu.
Ha pagkayana in padayun naman nga gin iimbestigahan hiton mga otoridad kun diin tikang an nasabi nga shabu.
Samtang, temporaryo naman nga naka paslak an suspek ha Allen Municipal Lock-up Cell ngan magaatubang hin kaso ha pagtalapas han Republic Act 9165 o Dangerous Drugs Act of 2002.
