TACLOBAN CITY – Nakuha han mga otoridad ha gindumara nga buy-bust operation ha Ridgeview Park, Brgy 97, Cabalawan, Tacloban City an sobra P600K nga kantidad han gintotoohan nga shabu.
Ginkilala an mga suspek kanda alyas “Waway”, 26-anyos an pangidaron ngan alyas “Ren”, 20-anyos an pangidaron, parehas residente han nasabi nga barangay.
Sumala kan PLt. Edwin Cañamaque, Chief hiton Community Affairs and Development Unit han Tacloban City Police Office, labot la han droga nga nakuha ha mga suspek in nakuhaan gihapon an mga ine hin Ingram nga pusil.
Narekupo tikang ha mga ine an 12 ka-sachet han gin aalegar nga shabu nga mayda kabug-aton nga 95 ka-gramos ngan mayda market value nga P645,000.
Nakuha gihapon ha mga ine an 9mm PAR Ingram US military rifle, duha nga bala, long magazine, ngan buy-bust money kaupod na an weighing scale.
Gin aandam naman na an kaso nga igpapasaka kontra ha mga suspetsado.
