TACLOBAN CITY – Ginmalatumat han mga grupo hiton negosyante ha nasyonal, nga waray paghuna-hunai hin maupay han mga senador an ginduduso nga balaudnon nga P100 wage increase ha mga mananarabaho ha pribado nga sektor nga kun diin, ginpaangbit han mga ine nga an nasabi nga balaudnon in usa nga pamaagi han pagpahamot han senado ha molupyo.
Sumala kan Hon. Colai Go Information Officer TFCCCI/Chairman han Brgy. 41 Tacloban City, nga usa hiya ha naabuyon ha mga pulong han mga nasyonal nga negosyante mahitungod nga an nasabi nga wage increase nga ginduduso han senado in waray umagi ha mga konsultasyon ha magkadurudilain nga chamber han negosyante ngan mga prior adjustments.
Dugang pa ni Go, dire hiya naabuyon ha tigdaay nga P100 wage increase mahitungod nga ha kaurhian in magduduso la ine ha paghitaas naliwat hiton inflation tungod nga iton mga negosyante in maghihitaas liwat ha ira mga produkto agud nga makasabay hira ha wage hike.
Sumala pa hine nga damo iton pamaagi agud nga makontrol iton presyo han mga papliton ngan nagpokus la daw anay unta an senado ha pagpapahamubo han inflation ha nasud.
Ha pagkayana, in nagkaurusa iton mga magkadurudilain nga chambers han negosyante ngan nagpasaka an mga ine hin position paper ha senado agud nga rebisahon an ginduduso nga P100 pesos wage increase.
