TACLOBAN CITY – Pormal nga nakarawat dida han nakalabay nga adlaw hiton munisipyo han San Miguel, Leyte, an P1.8 milyon kumo incentive han nakarawat nira nga pagkilala ha nasyonal nga lebel nga Seal of Good Local Governance Award.
Sumala kan Atty. Norman Sabdao Municipal Mayor han San Miguel, Leyte, gagamiton naman nira ine nga kantidad kumo budget han panhingayad hiton mga kakarsadahan ha San Miguel partikular nagihapon dida ha may Bairan to Malipuron Road.
Dugang pa ni Mayor Atty. Sabdao, nga an panuyuan hine in agud nga magin maupay iton karsada nga aagian hiton mga sarakyan ngan madagmit makag travel iton mabisita ha ira lugar ngan agud nga rumibhong gihapon iton ira turismo.
Nagpapasalamat naman ine ha tanan nga nakipagbisug ngan nakig-urusa, agud nga magin maupay pa iton serbisyo han ira bungto.
