TACLOBAN CITY – Nagpapadayon an mahugot nga mga pangandaman nga ginbubuhat ni Hari ng Pilipinas 2023 Jahaziel Ceballos nga usa nga Waraynon nga igrerepresentar an nasud Pilipinas ha pagdudumaraun nga Man of the Globe International Pageant 2024.
Sumala kan Ceballos han pagbisita ha Bombo Radyo Tacloban nga ha kaluyo han patigda nga pagpapasabot nga masabak ini ha International Pageant in nakakaya naman ini mahitungod manggud han iya na mga naeksperyensyahan nga napag-agian nga mga pageant.
“You know, through experience, nahasa nala kita. So yana, we just have to win it, make sure that Q and A goes smoothly, performance always at its peak. Also just enjoy the ride.” yakan ni Ceballos.
Usa manggud ha ira ginpapag andaman in an Question and Answer portion in labi na adtun Closed door interview nga nagkikinahanglan daw hin mahugot nga hibaro nga aatubangon an magkadurudilain naman nga mga judges.
Ha kaluyo han pagigin estudyante in iya naman daw nababalanse pinaagi han time management, ngan pagdidisiplina ha iya kalugaringon.
Dugang pa ni Ceballos nga an mao nga pageant in nagpapaiba han iba pa liwat nga male pageant mahitungod han adbokasiya nga naka pokus han child rights.
Nagpasalamat gihapon hi Ceballos ha mga nagpapaabot hin suporta ngan paghigugma.
“To all the listeners of Bombo Radyo and also my supporters from Hari ng Pilipinas, also for the Man of the Globe International Pageant, thank you so much. Subaybayan niyo po ako by following the Hari ng Pilipinas page or the official Man of the Globe International page to stay up to date and get the latest news from us.”
Hi Ceballos in nagdaog kumo Ginoong Sangyaw Eco-Tourism 2023 nga ginkoronahan naman nga Hari ng Pilipinas 2023.
Nakatalaan pagdumaraun an mao nga pageant yana nga December 14, 2024 ha Angeles City, Pampanga.
