TACLOBAN CITY – Arestado an usa nga lalaki mahuman nga makuhaan ine hin shabu ha ginbuhat nga buy-bust operation hiton mga otoridad ha Brgy. 106, Sto. Nino, Tacloban City dida han nakalabay nga adlaw.
Ginkilala an suspek kan alyas “Jessie”, 32-anyos an pangidaron, welder, ngan residente han mao nga barangay.
Sumala kan PLTCOL Edwin Cañamaque, Chief hiton City Community Affairs and Development Unit han Tacloban City Police Office, usa nga high value individual an suspek mahitungod han kadako han kantidad ngan han kabug-aton han droga nga nakuha haiya.
Nakuha ha suspetsado an 20 ka-pakete han gin-aalegar nga shabu nga may timbang nga maabot 264 ka-gramo ngan nagkakantidad hin P1,795,200.
Narekopo gihapon han mga otoridad an P1,000 boodle money, P500 buy bust money, ngan magkadurudilain nga mga drug paraphernalias.
Ha pagkayana in aada na hi alyas “Jessie” ha kustodiya han mga kapulisan ngan maatubang naman ine ha kaangayan nga kaso.
