TACLOBAN CITY – Dismayado an pira nga grupo hin mga kababayin-an ha Sinirangan Bisayas ha naging State of the Nation Address ni Presidente Ferdinand Marcos Jr.
Sumala kan Farah Biva Gamalo, han Oryang Women’s Group, nakulangan hira hin duro ha mao nga SONA han presidente tungod nga damo nga mga importante nga isyu an waray hini gintagan hin pagtagad.
Partikular na hini an bahin han accountability han Presidente bahin han gin aalegar extra judicial killings han drug war ni anay pangulong Duterte kun diin waray daw iginsaysay ni Marcos an iya bubuhaton bahin hini.
Dismayado gihapon daw an mao nga women’s group tungod nga waray gihapon kahingadayi ni Presidente Marcos Jr ha iya SONA an bahin han human rights nga usa ha pinakadako nga isyu ha nasud ha pagkayana.
Pira pa ha mga isyu nga waray hini ginlakip ha iya SONA in amo an bahin han rice tariffication law ngan sugadman an pagtanggal contractualization ngan han excise tax ha produktong petrolyo.
