TACLOBAN CITY – Nagpahimatngon an usa nga opisyal han Philippine Army ha mga sundalo nga magpabilin nga non partisan ngan diri umentra hin bisan ano nga klase hin politikal nga aktibidad may kalabutan ha eleksyon.
Sumala kan Col Noel Vestuir, brigade commander han 802nd Infantry Brigade nga nakabase ha Ormoc City, usa la an trabaho han mga sundalo ngan ini in siguruhon nga talwas ngan magigin mahimyang an tiarabot nga piniliay.
Ginduon hini nga kinahanglan nga diri magpakita an mga kasundaluhan nga mayda hira gindadapigan nga kandidato o mayda hira political color.
An mandato daw han Armed Forces of the Philippines (AFP) in protektahan an publiko ngan an estado ngan ini an ira magigin prioriyadad yana nga piniliay.
Samtang, nagpahayag liwat hi Vestuir nga padayon an ira aktibidad ngan pangandaman kaupod an mga kapulisan agud siguruhon nga mamimintinar an peace and order ha Leyte, Southern Leyte ngan Biliran ngan mapudngan nga magdurot hin kasamok an mga New People’s Army ha maabot nga eleksyon.
