TACLOBAN CITY – Ginsulod hin kawatan an opisina han Department of Trade and Industry (DTI) Leyte Provincial Office nga nahihimumutang ha Brgy. 60 Aslum, Sagkahan, Tacloban City dida han nakalabay nga mga adlaw.
Sumala kan PLTCOL Edwin Cañamaque, Chief hiton City Community Affairs and Development Unit han Tacloban City Police Office, ginreport ni alyas Rom, 35 anyos, driver han mao nga ahensya an pagkawara han pira nga gamit ngan kwarta ha ira opisina.
Nasabtan ipinaagi ha CCTV footage, nga usa lalaki nga an nakasulod ha opisina ipinaagi han pagguba han alkuba ngan ginkuha an duha nga laptop ngan kwarta nga nagkakantidad P3,000.
An gintutudlok nga suspek in waray pan-igbaw nga bado han buhaton an krimen, may tattoo ha luyo nga parte han iya lawas ngan nagsusul-ot hin itom nga pantalon.
Nagpapadayon naman yana an ginbubuhat nga follow-up investigation han nga kapulisan agud mahalpat an suspek.
