TACLOBAN CITY – Ginpatapod han Department of Social Welfare and Development (DSWD) region 8 nga magigin supisyente an ayuda nga ighahatag ha mga naapektuhan han shearline.
Ha assessment han Office of the Civil Defense Eastern Visayas, maabot ha 20,734 nga mga pamilya o 72 thousand nga mga indibidwal, an apektado han hiluagan nga pagbaha, kun diin ginbabana-bana nga 110 nga LGUs ha rehiyon an nagpatuman han pagkansela han klase ngan trabaho.
Lakip sa mga lugar nga lunod tubig baha an lugar han Jipapad Eastern Samar, nga haros lampas tawo na an tubig, ngan 5 ka beses na ine nga na-abat yana nga tuig.
Mayda pipira nga mga lugar naman an nakaeksperyensya hin landslides ngan pagkaruba hin mga balay sugad han La Paz Leyte.
An DSWD naman in nanhahatag na hin family food packs ngan non-food items ngadto han mga apektado han baha ha haros 121 nga barangay han rehiyon.
Waray naman nahipatik nga nawawara o namatay ha nasabi nga pagbaha, nga yana padayon nga nakakaeksperyensya hin pag-uran ha iba nga parte han Sinirangan Bisayas.
