Nagpatuman an city government han Tacloban hin one-way traffic scheme ha parte han Paseo de Legazpi ha Anibong kumo kaparte han pangandaman ngan pagserebrar han Sangyaw Festival 2026.
Sumala kan TOMECO Operation and Enforcement Head, Restituto Reglos, epektibo an one-way traffic tikang dida han Hunyo 5 kutob Hunyo 30, 2026, alas 5 han kulop kutob alas 12 han kaagahon.
Panuyuan hini nga mapabilin an maupay nga kiwa han trapiko ngan malikayan an pagbugi-ot han karsada ngan sugad man an seguridad han mga motorista ngan festival-goers ha panahon han selebrasyon, labi na nga aada namumutang an parayawan ha nasabi nga area.
Magtitikang an one-way traffic ha eskina han Leyte Progressive pakadto ha direksyon han Naga-Naga, samtang an mga northbound naman nga mga sarakyan nga masulod ha Downtown Tacloban via Maharlika Highway in ginpapahimatngun nga umagi ha Sergio Osmena Avenue.
Ginhahangyo naman ni Reglos ha mga molupyo nga sundon an mga nagpakatudlok nga ruta, traffic signs, parking ngan mga traffic personnel agud malikayan an paghuruot han kiwa hiton sarakyan.
Samtang, padayon naman nga ginaaghat han lokal nga pangobyernuhan an publiko nga magplano han ira biyahe ngan mag-alutaga hin kadugangan nga oras ha pag-biyahe mahitungod ha posible pagdamo han mga sarakyan yana nga selebrasyon han Sangyaw Festivel, partikular na gihapon ha adlaw han katung-tungan nga ginlalauman madamo iton bulyo han bisita.
