TACLOBAN CITY – Nagpahimatngun an Office of Civil Defense Regional Office VIII ha publiko nga magin mabantayon kasumpay ha tiarabot nga Bagyong Kristine ha nasud.
Sumala kan Office of Civil Defense Regional Office VIII, Regional Director, Lord Byron Torrecarion nga ha pagkayana in andam an ira buhatan agud bumulig ha posible nga epekto han Bagyong Kristine nga aada na ha sakob yana han Philippine Area of Responsibility.
Ginsigurado han opisyal an kaandaman sugad nala hiton prepositioning han mga asset ngan mga relief goods.
Dugang naman hini nga nagpadara na gihapon hira hin mga tawo partikular na ha norte nga parte han Eastern Samar ngan ha mga lugar ha Northern Samar nga ha pagkayana in nakaisa na iton Tropical Cycle Wind Signal No. 1,
Nangaro naman hin kooperasyon hi Torrecarion ha molupyo nga magin maikmat labi na an mga molupyo nga aada ha mga low-lying, flood prone ngan landslide prone nga areas.
Manunumduman nga nagpalusad na hin direktiba an OCD ha ira mga regional offices agud maghimo hin preparedness measures para ha mao nga bagyo.
